ମୁମ୍ବାଇ: କ୍ୟାନ୍ସର ପୀଡିତାଙ୍କ ଶେଷ ଇଚ୍ଛା ପୂରଣ କଲେ ବଲିଉଡ ଅଭିନେତା ଶାହରୁଖ । କିଙ୍ଗ ଖାନ ଶାହରୁଖଙ୍କର ଏମିତିରେ ଫ୍ୟାନ୍ସ ଫଲୋଇଙ୍ଗ ଯଥେଷ୍ଟ ଅଧିକ । ହେଲେ ଶାହରୁଖଙ୍କ ପାଇଁ ପାଗଳ ଏଇ ଫ୍ୟାନ୍ସଙ୍କୁ ଦେଖିଲେ ଜାଣିପାରିବେ ଶାହରୁଖ ପ୍ରକୃତରେ କେତେ ଲୋକପ୍ରିୟ ।
୬୦ ବର୍ଷର ଏହି ମହିଳା ଜଣଙ୍କ ଶାହରୁଖଙ୍କର ଜଣେ ବଡ ଫ୍ୟାନ । ମହିଳାଙ୍କ ନାଁ ଶିବାନୀ । ତେବେ ଦୁଃଖର କଥା ହେଉଛି ଶିବାନୀ କ୍ୟାନ୍ସର ପୀଡିତ । ଶେଷ ସମୟରେ ବି ତାଙ୍କର ଇଚ୍ଛା ଶାହରୁଖଙ୍କୁ ଦେଖା କରିବା ପାଇଁ । ଏକଥା ଶାହରୁଖଙ୍କ କାନରେ ପଡିବା ପରେ ସେ ତୁରନ୍ତ ତାଙ୍କର ଶେଷ ଇଚ୍ଛା ପୂରଣ କରିଛନ୍ତି । ସେତିକି ନୁହେଁ, ତାଙ୍କର ଚିକିତ୍ସା ଖର୍ଚ୍ଚ ଉଠାଇବା ପାଇଁ ମଧ୍ୟ ପ୍ରତିଶ୍ରୁତି ଦେଇଛନ୍ତି ଶାହରୁଖ । ଦରିଆ ଦିଲ ଶାହରୁଖଙ୍କ ଏପରି କାମ ଫ୍ୟାନ୍ସଙ୍କ ମନକୁ ଛୁଇଁ ଯାଇଛି । ଏ ନେଇ ଫ୍ୟାନ୍ସମାନେ ଖୁବ ତାରିଫ କରିଛନ୍ତି କିଙ୍ଗ ଖାନଙ୍କର ।
କ୍ୟନ୍ସର ପୀଡିତା ଶିବାନୀଙ୍କର ଶେଷ ଇଚ୍ଛା ଜାଣିବା ପରେ ଶାହରଖ ତୁରନ୍ତ ତାଙ୍କୁ ଭିଡିଓ କଲ କରିଥିଲେ । ପାଖାପାଖି ୪୫ ମିନିଟ ଧରି ତାଙ୍କ ସହ କଥା ହୋଇଥିଲେ । ଭିଡିଓ କଲିଂ ସମୟରେ ଶିବାନୀ କହିଥିଲେ, ସେ ତାଙ୍କର ସବୁ ଫିଲ୍ମ ଦେଖିଛନ୍ତି । ଏପରକି କ୍ୟାନ୍ସର ଚିକିତ୍ସା ଚାଲିଥିବା ସମୟରେ ବି ସେ ହଲକୁ ଯାଇ ତାଙ୍କର ‘ପଠାନ’ ଫିଲ୍ମ ଦେଖିଥିବା କହିଥିଲେ ।
ଶାହରୁଖ ତାଙ୍କୁ କୋଲକାତା ଯାଇ ସକ୍ଷାତ କରିବାର ପ୍ରତିଶ୍ରୁତି ବି ଦେଇଛନ୍ତି । ତା ଛଡା କ୍ୟାନ୍ସର ଚିକିତ୍ସା ପାଇଁ ହେଉଥିବା ସମସ୍ତ ଖର୍ଚ୍ଚ ସେ ବହନ କରିବେ ବୋଲି ବି ଶିବାନୀଙ୍କୁ କହିଥିବା ଶିବାନୀଙ୍କ ଝିଅ ମିଡିଆକୁ କହିଛନ୍ତି ।
ପ୍ରକୃତରେ ଶିବାନୀ ଶାହରୁଖଙ୍କର ଜଣେ ବହୁତ ବଡ ପ୍ରଶଂସକ । ସେ ତାଙ୍କ ରୁମରେ ଶାହରୁଖଙ୍କର ଅନେକ ଫଟୋ ଲଗାଇଛନ୍ତି । ଏପରିକି ଶାହରୁଖ ଆଇପିଏଲ ଟିମ କରିବା ପରେ ସେ କ୍ରିକେଟକୁ ବି ପସନ୍ଦ କରିବା ଆରମ୍ଭ କରିଥିବା କହିଛନ୍ତି ।
