ବ୍ରହ୍ମପୁର: ଗଞ୍ଜାମ ଜିଲା ଛତ୍ରପୁର ଠାରେ ରହିଥିବା ଛତ୍ରପୁର ସରକାରୀ ବିଜ୍ଞାନ ମହାବିଦ୍ୟାଳୟରେ ନୂତନ ଭାବରେ ୯ଟି ବିଭାଗର ପିଜି ପାଠ୍ୟକ୍ରମ ଖୋଲିବାକୁ ଖୋଲିବାକୁ ଅନୁମତି ମିଳିଛି। ରାଜ୍ୟ ଉଚ୍ଚଶିକ୍ଷା ବିଭାଗ ପକ୍ଷରୁ ଅନୁମତି ମିଳିଥିବା ବେଳେ ଏହାକୁ ନେଇ ଖୁସିର ମାହୋଲ ଦେଖାଯାଇଛି।
ମହାବିଦ୍ୟାଳୟରେ ନୂତନ ଭାବରେ ଖୋଲାଯିବାକୁ ରହିଥିବା ବିଭାଗ ଗୁଡିକ ମଧ୍ୟରେ ବିଜ୍ଞାନ ବିଭାଗର ପାଞ୍ଚଟି ବିଭାଗ ଖୋଲାଯାଇଥିବା ବେଳେ ଏହି ସମସ୍ତ ବିଭାଗର ୧୬ ଲେଖାଏଁ ସିଟ୍ ରହିଛି। ବିଭାଗଗୁଡ଼ିକ ହେଲା ବଟନୀ, କେମେଷ୍ଟ୍ରି, ଫିଜିକ୍ସ, ଜୁଲୋଜି ଏବଂ ମେଥ୍।
ସେହିପରି ବାଣିଜ୍ୟ ବିଭାଗର ପିଜି ଖୋଲିବା ୩୨ ସିଟ୍ ରହିଥିବା ବେଳେ କଳା ବିଭାଗରେ ଅର୍ଥନୀତି, ଇଂରାଜୀ ଏବଂ ରାଜନୀତି ବିଜ୍ଞାନ ବିଭାଗର ୩୨ ଲେଖାଏଁ ସିଟ୍ ଅନୁମତି ଦିଆଯାଇଛି। ପୂର୍ବରୁ ଇତିହାସ ବିଭାଗରେ ରହିଥିବା ୧୬ ସିଟ୍ କୁ ବୃଦ୍ଧି କରାଯାଇ ୩୨ ସିଟ୍ କରାଯାଇଥିବା ବେଳେ ଓଡ଼ିଆ ବିଭାଗରେ ରହିଥିବା ୮ ସିଟ୍କୁ ବୃଦ୍ଧି କରାଯାଇ ୩୨ ସିଟ୍ କରାଯାଇଛି।
ଏଭଳି ୯ଟି ନୂତନ ପୋଷ୍ଟ ଗ୍ରାଜୁଅଟ୍ ବିଭାଗ ଖୋଲାଯିବାକୁ ଅନୁମତି ସହ ପୂର୍ବରୁ ରହିଥିବା ଦୁଇ ବିଭାଗର ସିଟ୍ ବୃଦ୍ଧି କରାଯିବାକୁ ଉଚ୍ଚ ଶିକ୍ଷା ଅନୁମତି ଦେଇଥିବା ନେଇ ଏହି ଅବସରରେ ମହାବିଦ୍ୟାଳୟର ପୂର୍ବତନ ଛାତ୍ର ସଂସଦର ସଭାପତି ବ୍ରଜ ମୋହନ ଆଚାର୍ଯ୍ୟ, ସଂପାଦକ ସମୀର ଆଚାର୍ଯ୍ୟ, ଆଇନଜୀବୀ ପି.ଧର୍ମା ରେଡି, ଜିଲା ପରିଷଦ ସଦସ୍ୟ ତଥା ଛତ୍ରପୁର ବ୍ଳକର ପୂର୍ବତନ ଅଧ୍ୟକ୍ଷ ଏମ୍. ଧନଞ୍ଜୟ ରେଡି, ବିଜୁ ଛାତ୍ର ଜନତା ଦଳର ଗଞ୍ଜାମ ଜିଲା ସଭାପତି ପ୍ରଶାନ୍ତ କୁମାର ପଣ୍ଡା,ଏଲ୍.ଗୋପି, ଛାତ୍ର ସଂସଦର ପ୍ରଥମ ସଭାପତି ଦେବେନ୍ଦ୍ର ନାଥ ସାହୁ, ସନ୍ତୋଷ କୁମାର ମିଶ୍ର, ହିମାଂଶୁ ଯାଦବଙ୍କ ସମେତ ବହୁ ପୁରାତନ ଛାତ୍ର ସଂସଦର କର୍ମକର୍ତ୍ତା ମାନେ ସ୍ବାଗତ କରିଛନ୍ତି।
