ଭୁବନେଶ୍ୱର: ଆସନ୍ତାକାଲି, ସେପ୍ଟେମ୍ବର ୨୮ରୁ ଦେଶରେ ତିନି ଦିନିଆ ବ୍ୟାଙ୍କ ଧର୍ମଘଟ ଆରମ୍ଭ ହେବ। ସେପ୍ଟେମ୍ବର ୨୮, ୨୯ ଓ ୩୦ ତାରିଖରେ ବ୍ୟାଙ୍କ ୟୁନିଅନଗୁଡ଼ିକ ପକ୍ଷରୁ ଧର୍ମଘଟ ଡାକ ଦିଆଯାଇଛି। ଏହା ଯୋଗୁଁ ବ୍ୟାଙ୍କ ଶାଖାରେ ଗ୍ରାହକ ସେବା ପ୍ରଭାବିତ ହୋଇପାରେ। ତେବେ UPI, ATM ଓ ଅନଲାଇନ୍ ବ୍ୟାଙ୍କିଂ ସେବାକୁ ନେଇ ଲୋକଙ୍କ ମନରେ ଅନେକ ପ୍ରଶ୍ନ ରହିଛି।
UPI ବନ୍ଦ ହେବ କି?
ବ୍ୟାଙ୍କ ଧର୍ମଘଟ ଯୋଗୁଁ UPI ସେବା ସାଧାରଣତଃ ବନ୍ଦ ହେବ ନାହିଁ। UPI ମାଧ୍ୟମରେ ଟଙ୍କା ପଠାଇବା, QR କୋଡ୍ରେ ପେମେଣ୍ଟ କରିବା ଏବଂ ଅନଲାଇନ୍ ବିଲ୍ ପେମେଣ୍ଟ ଭଳି ଡିଜିଟାଲ୍ କାରବାର ଜାରି ରହିବ ବୋଲି ଆଶା କରାଯାଉଛି।
ସେହିପରି ମୋବାଇଲ୍ ବ୍ୟାଙ୍କିଂ ଓ ଇଣ୍ଟରନେଟ୍ ବ୍ୟାଙ୍କିଂ ମଧ୍ୟ କାର୍ଯ୍ୟକ୍ଷମ ରହିବ। ତେବେ ସର୍ଭର କିମ୍ବା ଟେକ୍ନିକାଲ୍ ସମସ୍ୟା ହେଲେ ଡିଜିଟାଲ୍ ସେବା ପ୍ରଭାବିତ ହୋଇପାରେ।
ATMରୁ ଟଙ୍କା ଉଠାଇପାରିବେ କି?
ଧର୍ମଘଟ ସମୟରେ ATM ସେବା ମଧ୍ୟ ଚାଲୁ ରହିବାର ସମ୍ଭାବନା ରହିଛି। ତେଣୁ ଗ୍ରାହକମାନେ ATMରୁ ଟଙ୍କା ଉଠାଇପାରିବେ।
ତେବେ କୌଣସି ATMରେ ଟଙ୍କା ଶେଷ ହୋଇଗଲେ କିମ୍ବା ଯାନ୍ତ୍ରିକ ସମସ୍ୟା ଦେଖାଦେଲେ ସାମୟିକ ଭାବେ ଟଙ୍କା ଉଠାଇବାରେ ସମସ୍ୟା ହୋଇପାରେ। ତେଣୁ ଆବଶ୍ୟକ ଥିଲେ ପୂର୍ବରୁ କିଛି ନଗଦ ଟଙ୍କା ରଖିବା ଭଲ।
କେଉଁ ସେବା ପ୍ରଭାବିତ ହୋଇପାରେ?
ଧର୍ମଘଟର ପ୍ରଭାବ ମୁଖ୍ୟତଃ ବ୍ୟାଙ୍କ ଶାଖାର କାଉଣ୍ଟର ସେବା ଉପରେ ପଡ଼ିପାରେ। ଶାଖାରେ ନଗଦ ଜମା କିମ୍ବା ଉଠାଣ, ଚେକ୍ ପ୍ରକ୍ରିୟାକରଣ, କିଛି KYC କାର୍ଯ୍ୟ, ଡକ୍ୟୁମେଣ୍ଟ ଦାଖଲ ଏବଂ ଅନ୍ୟାନ୍ୟ କାଉଣ୍ଟର ସେବା ବନ୍ଦ କିମ୍ବା ବିଳମ୍ବିତ ହୋଇପାରେ।
ତେଣୁ ଧର୍ମଘଟ ସମୟରେ ଜରୁରୀ ବ୍ୟାଙ୍କ କାମ ଥିଲେ, ସମ୍ଭବ ହେଲେ ସେପ୍ଟେମ୍ବର ୨୮ ପୂର୍ବରୁ ତାହା ସାରିଦେବା ଭଲ।
