ଭୁବନେଶ୍ୱର: ନୟାପଲ୍ଲୀ ଥାନା ପୋଲିସ ଏକ ଆନ୍ତଃରାଜ୍ୟ ମୋବାଇଲ୍ ଚୋରି ଗ୍ୟାଙ୍ଗର ୮ ଜଣ ମହିଳା ସଦସ୍ୟଙ୍କୁ ଗିରଫ କରି କୋର୍ଟ ଚାଲାଣ କରିଛି। ଏହି ଗ୍ୟାଙ୍ଗ୍ ମହାରାଷ୍ଟ୍ର, ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ ଓ ବଙ୍ଗଳାଦେଶ ସୀମାନ୍ତ ଅଞ୍ଚଳରୁ ଆସି ଭୁବନେଶ୍ୱରରେ ସକ୍ରିୟ ଥିଲା।
ସୂଚନା ଅନୁସାରେ, ଗତ କିଛି ମାସ ଧରି ଏହି ଗ୍ୟାଙ୍ଗ୍ ସହରର ବସ୍, ବଜାର ଓ ଜନଗହଳିପୂର୍ଣ୍ଣ ସ୍ଥାନରେ ଯାତ୍ରୀଙ୍କ ମୋବାଇଲ୍, ନଗଦ ଟଙ୍କା ଓ ଅନ୍ୟାନ୍ୟ ମୂଲ୍ୟବାନ୍ ଜିନିଷ ଚୋରି କରୁଥିଲା। ଏହି ସୂଚନା ପାଇ ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରି ପାଟ୍ରୋଲିଂ ଜାରି ରଖିଥିଲା।
ଗିରଫ ପ୍ରକ୍ରିୟା
ଆଜି ସକାଳ ପ୍ରାୟ ୧୧.୪୫ ଘଟିକାରେ ସିଆରପି ଛକ ବସ୍ ଷ୍ଟପେଜରେ ୮ ଜଣ ହିନ୍ଦୀଭାଷୀ ମହିଳା ଚୋରା ମୋବାଇଲ୍ କମ୍ ଦାମରେ ବିକ୍ରି କରିବାକୁ ଗ୍ରାହକଙ୍କ ସହ ଯୋଗାଯୋଗ କରୁଥିବା ସୂଚନା ମିଳିଥିଲା। ପୋଲିସ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ସନ୍ଦେହଜନକ ମହିଳାଙ୍କୁ ଅଟକ ରଖି ଯାଞ୍ଚ ଆରମ୍ଭ କରିଥିଲା।
ତଲାସି ବେଳେ ମଙ୍ଗଳା ଅଶୋକ ହାଟଗଡେଙ୍କ ବ୍ୟାଗରୁ ୬ଟି ଏବଂ ରତ୍ନା ଲୋଣ୍ଡେଙ୍କ ବ୍ୟାଗରୁ ୪ଟି ଆଣ୍ଡ୍ରଏଡ୍ ମୋବାଇଲ୍ ଫୋନ୍ ଉଦ୍ଧାର କରାଯାଇଥିଲା। ପଚରାଉଚରାରେ ଅଭିଯୁକ୍ତାମାନେ ସ୍ୱୀକାର କରିଛନ୍ତି ଯେ, ସେମାନେ ଭୁବନେଶ୍ୱରର ବିଭିନ୍ନ ଅଞ୍ଚଳରୁ ଏହି ଫୋନ୍ ଗୁଡ଼ିକ ଚୋରି କରିଥିଲେ।
ସୁସଂଗଠିତ ଗ୍ୟାଙ୍ଗ୍
ତଦନ୍ତରୁ ଜଣାପଡ଼ିଛି ଯେ, ଏହି ମହିଳାମାନେ ଏକ ସୁସଂଗଠିତ ଆନ୍ତଃରାଜ୍ୟ ଚୋରି ଗ୍ୟାଙ୍ଗର ସଦସ୍ୟା। ଗ୍ୟାଙ୍ଗ୍ରେ ମହାରାଷ୍ଟ୍ର, ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ ସମେତ ବିଭିନ୍ନ ରାଜ୍ୟର ଲୋକ ସାମିଲ୍ ଅଛନ୍ତି। ମହିଳା ଓ ଶିଶୁ ସଦସ୍ୟାମାନେ ଭିଡ଼ପୂର୍ଣ୍ଣ ସ୍ଥାନରେ ଚୋରି କରନ୍ତି, ପୁରୁଷ ସଦସ୍ୟାମାନେ ଚୋରି ସାମଗ୍ରୀ ସଂଗ୍ରହ କରି ଅନ୍ୟ ରାଜ୍ୟରେ ବିକ୍ରି କରନ୍ତି।
ଅଭିଯୁକ୍ତାମାନଙ୍କର କୌଣସି ସ୍ଥାୟୀ ଠିକଣା ନାହିଁ। ସେମାନେ ପୂର୍ବରୁ ମଧ୍ୟ ବହୁ ଚୋରି ହୋଇଥିବା ମୋବାଇଲ୍ ମହାରାଷ୍ଟ୍ର, ପଶ୍ଚିମବଙ୍ଗ, ଝାଡ଼ଖଣ୍ଡ, ବିହାର ଓ ବଙ୍ଗଳାଦେଶ ସୀମାନ୍ତରେ ବିକ୍ରି କରୁଥିଲେ ବୋଲି ପୋଲିସ୍କୁ ପ୍ରକାଶ କରିଛନ୍ତି।
ପୋଲିସ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ଏବଂ ଅନ୍ୟ ସମ୍ପୃକ୍ତ ଅଭିଯୁକ୍ତଙ୍କୁ ଚିହ୍ନଟ କରିବା ପାଇଁ ଅଧିକ ତଦନ୍ତ ଜାରି ରହିଛି।
