ଟଏଲେଟ୍ରେ ରକ୍ତ ଦେଖିଲେ ଅନେକଙ୍କ ମନରେ ପ୍ରଥମେ ‘ପାଇଲ୍ସ’ ଭାବନା ଆସେ। କିନ୍ତୁ ମଳତ୍ୟାଗ ସମୟରେ ରକ୍ତସ୍ରାବ କିମ୍ବା ଯନ୍ତ୍ରଣାର କାରଣ ସବୁବେଳେ ପାଇଲ୍ସ ନୁହେଁ। ଏହା ଆନାଲ୍ ଫିସର ଅର୍ଥାତ୍ ମଳଦ୍ୱାରର ଭିତର ତ୍ୱଚାରେ ଛୋଟ ଫାଟ ଯୋଗୁଁ ମଧ୍ୟ ହୋଇପାରେ।
ମଣିପାଲ୍ ହସ୍ପିଟାଲ୍ ଗୁରୁଗ୍ରାମର ଜେନେରାଲ୍, ମିନିମାଲ୍ ଆକ୍ସେସ୍, ବାରିଆଟ୍ରିକ୍ ଓ ରୋବୋଟିକ୍ ସର୍ଜରୀ ବିଭାଗର ଚେୟାରମ୍ୟାନ୍ ଓ HOD ଡା. ସୁମିତ ଶାହଙ୍କ କହିବା ଅନୁସାରେ, ପାଇଲ୍ସ ଓ ଆନାଲ୍ ଫିସରର ଲକ୍ଷଣ କିଛିଟା ସମାନ ହୋଇପାରେ।
ପାଇଲ୍ସ ଓ ଫିସର ମଧ୍ୟରେ ପାର୍ଥକ୍ୟ
ଆନାଲ୍ ଫିସର: ମଳତ୍ୟାଗ ସମୟରେ ତୀବ୍ର, ଧାରୁଆ କିମ୍ବା ଜ୍ୱଳନ ଭଳି ଯନ୍ତ୍ରଣା ହୋଇପାରେ। ଏହି ଯନ୍ତ୍ରଣା କିଛି ସମୟ ପର୍ଯ୍ୟନ୍ତ ରହିପାରେ। ଏହା ସହ ଟଏଲେଟ୍ ପେପର୍ କିମ୍ବା କମୋଡ୍ରେ ତାଜା ଲାଲ୍ ରକ୍ତ ଦେଖାଯାଇପାରେ।
ପାଇଲ୍ସ: ମଳଦ୍ୱାର ଚାରିପାଖରେ ଖୁଜୁଲି, ଅସୁବିଧା କିମ୍ବା ଭାରି ଲାଗିବା ଭଳି ଲକ୍ଷଣ ହୋଇପାରେ। ଭିତର ପାଇଲ୍ସରେ ଅନେକ ସମୟରେ ଯନ୍ତ୍ରଣା ବିନା ରକ୍ତସ୍ରାବ ହୋଇଥାଏ। ଗୁରୁତର ଅବସ୍ଥାରେ ମଳତ୍ୟାଗ ସମୟରେ ଫୁଲିଥିବା ରକ୍ତନଳୀ ବାହାରକୁ ଆସିପାରେ।
କାହିଁକି ହୁଏ?
ଦୀର୍ଘ ସମୟର କୋଷ୍ଠକାଠିନ୍ୟ, ମଳତ୍ୟାଗ ସମୟରେ ଅଧିକ ଜୋର ଦେବା ଏବଂ କମ୍ ଫାଇବର୍ ଖାଇବା ଏହି ସମସ୍ୟାର ପ୍ରମୁଖ କାରଣ ହୋଇପାରେ। କଠିନ ମଳ ମଳଦ୍ୱାର ଅଞ୍ଚଳରେ ଚାପ ଓ ଆଘାତ ସୃଷ୍ଟି କରିପାରେ। ଏହା ବ୍ୟତୀତ ଗର୍ଭାବସ୍ଥା, ଭାରି ଓଜନ ଉଠାଇବା, ଦୀର୍ଘ ସମୟ ଟଏଲେଟ୍ରେ ବସି ରହିବା ଓ ଦୀର୍ଘକାଳୀନ ଡାଏରିଆ ମଧ୍ୟ ଝୁମ୍ପ ବଢ଼ାଇପାରେ।
ସୁସ୍ଥ ରହିବା ପାଇଁ ୫ଟି ଅଭ୍ୟାସ
– ଫଳ, ପନିପରିବା, ସମ୍ପୂର୍ଣ୍ଣ ଶସ୍ୟ ଓ ଡାଲି ଭଳି ଫାଇବର୍ଯୁକ୍ତ ଖାଦ୍ୟ ଖାଆନ୍ତୁ।
– ପର୍ଯ୍ୟାପ୍ତ ପାଣି ପିଅନ୍ତୁ।
– ମଳତ୍ୟାଗ ସମୟରେ ଅଧିକ ଜୋର ଦିଅନ୍ତୁ ନାହିଁ।
– ଟଏଲେଟ୍ରେ ଦୀର୍ଘ ସମୟ ବସି ମୋବାଇଲ୍ ଚଲାଇବା ଅଭ୍ୟାସ ଏଡ଼ାନ୍ତୁ।
– ନିୟମିତ ଶାରୀରିକ କାର୍ଯ୍ୟକଳାପ କରନ୍ତୁ।
ଡାକ୍ତରଙ୍କ ପରାମର୍ଶ କାହିଁକି ଜରୁରୀ?
ସାଧାରଣତଃ ବାହ୍ୟ ଅଞ୍ଚଳର ଯାଞ୍ଚ ମାଧ୍ୟମରେ ଫିସର ଚିହ୍ନଟ କରାଯାଇପାରେ। ଆବଶ୍ୟକ ହେଲେ ଡାକ୍ତର ଆନୋସ୍କୋପ୍ ନାମକ ଏକ ଛୋଟ ଯନ୍ତ୍ର ଦ୍ୱାରା ଭିତର ଅଞ୍ଚଳ ପରୀକ୍ଷା କରିପାରନ୍ତି।
ପ୍ରାରମ୍ଭିକ ଅବସ୍ଥାରେ ଫାଇବର୍ ବଢ଼ାଇବା, ପାଣି ପିଇବା, ଡାକ୍ତରଙ୍କ ପରାମର୍ଶରେ ଷ୍ଟୁଲ୍ ସଫ୍ଟନର୍ ଏବଂ ଗରମ ପାଣିରେ ସିଟ୍ଜ୍ ବାଥ୍ ଭଳି ଚିକିତ୍ସାରେ ଉପକାର ମିଳିପାରେ। ଲକ୍ଷଣ ଜାରି ରହିଲେ ଡାକ୍ତରଙ୍କ ପରାମର୍ଶ ଅନୁସାରେ ଅନ୍ୟ ଚିକିତ୍ସା କିମ୍ବା ସର୍ଜରୀ ଆବଶ୍ୟକ ହୋଇପାରେ।
ବିଦ୍ର: ମଳଦ୍ୱାରରୁ ବାରମ୍ବାର ରକ୍ତସ୍ରାବ, ତୀବ୍ର ଯନ୍ତ୍ରଣା, ଜ୍ୱର କିମ୍ବା ହଠାତ୍ ମଳତ୍ୟାଗର ଅଭ୍ୟାସରେ ପରିବର୍ତ୍ତନ ହେଲେ ଏହାକୁ ଅଣଦେଖା ନକରି ଡାକ୍ତରଙ୍କ ପରାମର୍ଶ ନିଅନ୍ତୁ।
ଏହି ତଥ୍ୟ କେବଳ ସାଧାରଣ ସୂଚନା ପାଇଁ। ଏହା ଡାକ୍ତରଙ୍କ ବ୍ୟକ୍ତିଗତ ଚିକିତ୍ସା ପରାମର୍ଶର ବିକଳ୍ପ ନୁହେଁ।
