ଭୁବନେଶ୍ୱର: ଏକାମ୍ର ରେସିଡେନ୍ସିରେ ଫ୍ଲାଟ୍ ବୁକିଂ ପୂର୍ବରୁ UAN ପଞ୍ଜୀକରଣକୁ ନେଇ ଭୁବନେଶ୍ୱର ବିକାଶ ପ୍ରାଧିକରଣ ବା BDA ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। ‘UAN ନଥିଲେ ଫ୍ଲାଟ୍ ବୁକ୍ କରିହେବ ନାହିଁ’ ବ୍ୟବସ୍ଥା କୌଣସି ନୂଆ ନିୟମ ନୁହେଁ ବୋଲି BDA କହିଛି।
BDAର ସୂଚନା ଅନୁଯାୟୀ, BDA Property (Management & Allotment) Regulations, 2015ର ଧାରା ୫୩ ଓ ୫୪ ଅନୁସାରେ BDAର ଅଧିକାରିକ ୱେବସାଇଟ୍ରେ ଅନଲାଇନ୍ ପଞ୍ଜୀକରଣ ବାଧ୍ୟତାମୂଳକ ଥିଲା। ଅନଲାଇନ୍ ପଞ୍ଜୀକରଣ ସମୟରେ ପରିବାରର ସମସ୍ତ ସଦସ୍ୟଙ୍କ ଆଧାର ନମ୍ବର ଦେବାକୁ ପଡ଼ୁଥିଲା।
ଏହି ଅନଲାଇନ୍ ପଞ୍ଜୀକରଣ ଆଧାରରେ ଆବେଦନକାରୀଙ୍କ ପାଇଁ Unique Account Number ବା UAN ସୃଷ୍ଟି କରାଯାଉଥିଲା। ପରବର୍ତ୍ତୀ ସମୟରେ BDA ସହ ବିଭିନ୍ନ କାରବାର ଓ ସେବା ପାଇଁ ଏହି UAN ବ୍ୟବହାର କରାଯାଉଥିଲା।
ସେହିପରି, BDA Operation and Allotment Regulations, 2023ର ଧାରା ୬(୧) ଅନୁଯାୟୀ ମଧ୍ୟ BDAର ଅଧିକାରିକ ୱେବସାଇଟ୍ରେ ଅନଲାଇନ୍ ପଞ୍ଜୀକରଣ ବ୍ୟବସ୍ଥା ଜାରି ରହିଛି। ତେଣୁ ଫ୍ଲାଟ୍ ପାଇଁ ଆବେଦନ କରିବା ପୂର୍ବରୁ UAN ସୃଷ୍ଟି କରିବାର ବ୍ୟବସ୍ଥା ନୂଆ ପ୍ରଣାଳୀ ନୁହେଁ ବୋଲି BDA ସ୍ପଷ୍ଟ କରିଛି।
ଏକାମ୍ର ରେସିଡେନ୍ସିରେ ଫ୍ଲାଟ୍ ବୁକିଂ ପୂର୍ବରୁ UAN ପଞ୍ଜୀକରଣ ବାଧ୍ୟତାମୂଳକ ରହିଛି। BDA କହିଛି, ଏହି ବ୍ୟବସ୍ଥା ପୂର୍ବରୁ ମଧ୍ୟ ବିଭିନ୍ନ ହାଉସିଂ ପ୍ରକଳ୍ପରେ ଲାଗୁ ହୋଇଥିଲା। ୨୦୧୬ର ପାଇକରାପୁର ହାଉସିଂ ପ୍ରୋଜେକ୍ଟ, ୨୦୧୬ର ଅନନ୍ତ ବିହାର ଫେଜ୍-II HIG କୋର୍ ହାଉସିଂ ପ୍ରୋଜେକ୍ଟ, ୨୦୨୪ର ଦୟା ଏନକ୍ଲେଭ୍ ସମେତ ଇ-ଅକ୍ସନ୍ ମାଧ୍ୟମରେ ହୋଇଥିବା ଅନ୍ୟାନ୍ୟ ଆବଣ୍ଟନରେ ମଧ୍ୟ UAN ବ୍ୟବସ୍ଥା ରହିଥିଲା।
କେବଳ ଫ୍ଲାଟ୍ ବୁକିଂ ନୁହେଁ, ଆବଣ୍ଟନ ପୂର୍ବ ଓ ପରବର୍ତ୍ତୀ ବିଭିନ୍ନ ସେବା ପାଇଁ ମଧ୍ୟ UAN ଆବଶ୍ୟକ ହୋଇଥାଏ। ଲଟେରୀ, ବକେୟା ଅର୍ଥ ପୈଠ, ଲିଜ୍ ଡିଡ୍ କିମ୍ବା ସେଲ୍ ଡିଡ୍ ସମ୍ପାଦନ, ସମ୍ପତ୍ତି ହସ୍ତାନ୍ତର ଏବଂ ବ୍ୟାଙ୍କ ଋଣ ପାଇଁ No Objection Certificate ବା NOC ଜାରି ଭଳି କାର୍ଯ୍ୟରେ UAN ବ୍ୟବହାର ହୋଇଥାଏ।
BDA ପକ୍ଷରୁ ଆହୁରି କୁହାଯାଇଛି ଯେ, UAN ପଞ୍ଜୀକରଣ ସମ୍ପୂର୍ଣ୍ଣ ମାଗଣା। ଏଥିପାଇଁ କୌଣସି ପଞ୍ଜୀକରଣ ଶୁଳ୍କ ଦେବାକୁ ପଡ଼ିବ ନାହିଁ। UAN ପଞ୍ଜୀକରଣ ପ୍ରକ୍ରିୟାକୁ ୪୮ ଘଣ୍ଟା ମଧ୍ୟରେ ସମ୍ପନ୍ନ କରିବା ପାଇଁ ମଧ୍ୟ ବ୍ୟବସ୍ଥା କରାଯାଇଛି।
UAN ପଞ୍ଜୀକରଣ ସମୟରେ କୌଣସି ସମସ୍ୟା ହେଲେ ଆବେଦନକାରୀମାନେ uanbda@gmail.com ଇ-ମେଲ୍ ଆଇଡିରେ ଯୋଗାଯୋଗ କରିପାରିବେ। ଏଥିସହ BDA କାର୍ଯ୍ୟାଳୟରେ ଥିବା ହେଲ୍ପ ଡେସ୍କରୁ ମଧ୍ୟ UAN ପଞ୍ଜୀକରଣ ସମ୍ପର୍କିତ ସହାୟତା ନେଇପାରିବେ।
ତେଣୁ, ଏକାମ୍ର ରେସିଡେନ୍ସିରେ ଫ୍ଲାଟ୍ ବୁକିଂ ପାଇଁ UAN ଆବଶ୍ୟକତା ଏକ ନୂଆ ବ୍ୟବସ୍ଥା ନୁହେଁ, ବରଂ BDAର ପୂର୍ବରୁ ଚାଲିଆସୁଥିବା ଅନଲାଇନ୍ ପଞ୍ଜୀକରଣ ଓ ସମ୍ପତ୍ତି ଆବଣ୍ଟନ ପ୍ରକ୍ରିୟାର ଅଂଶ ବୋଲି ପ୍ରାଧିକରଣ ପକ୍ଷରୁ କୁହାଯାଇଛି।
