ଭୁବନେଶ୍ୱର: ବିଜେଡିର ବରିଷ୍ଠ ନେତା ତଥା ପୂର୍ବତନ କ୍ୟାବିନେଟ୍ ମନ୍ତ୍ରୀ ବିକ୍ରମ କେଶରୀ ଆରୁଖଙ୍କୁ ନେଇ ଓଡ଼ିଶା ରାଜନୀତିରେ ଏବେ ଜୋରଦାର ଚର୍ଚ୍ଚା। ଗତ କିଛି ମାସ ଧରି ସେ ଦଳୀୟ କାର୍ଯ୍ୟକ୍ରମରୁ ଦୂରେଇ ରହୁଥିବାବେଳେ, ଆସନ୍ତା ପଞ୍ଚାୟତ ଓ ପୌର ନିର୍ବାଚନ ପୂର୍ବରୁ ସେ ବିଜେଡି ଛାଡ଼ି ବିଜେପିରେ ଯୋଗ ଦେଇପାରନ୍ତି ବୋଲି ରାଜନୈତିକ ମହଳରେ ଆଲୋଚନା ଜୋର ଧରିଛି। ଯଦିଓ ଏନେଇ ବିକ୍ରମ ଆରୁଖ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହାନ୍ତି।
ବିଜେଡି କାର୍ଯ୍ୟକ୍ରମରୁ ଦୂରରେ ବିକ୍ରମ
୨୦୨୪ ବିଧାନସଭା ନିର୍ବାଚନରେ ପରାଜୟ ପରଠାରୁ ବିକ୍ରମ ଆରୁଖଙ୍କୁ ବିଜେଡିର ଅଧିକାଂଶ ସାଙ୍ଗଠନିକ କାର୍ଯ୍ୟକ୍ରମରେ ଦେଖିବାକୁ ମିଳୁନାହିଁ। ବିଜେଡିର ରାଜନୈତିକ ବ୍ୟାପାର କମିଟିର ସଦସ୍ୟ ଥିଲେ ମଧ୍ୟ ସେ ବୈଠକରେ ଅନୁପସ୍ଥିତ ରହୁଥିବା ଏବଂ ଗଞ୍ଜାମ ଜିଲ୍ଲାର ଦଳୀୟ କାର୍ଯ୍ୟକ୍ରମରେ ମଧ୍ୟ ଯୋଗ ଦେଉନଥିବା ଚର୍ଚ୍ଚାକୁ ଆହୁରି ବଳ ଦେଇଛି।
ସୁଜାତା କାର୍ତ୍ତିକେୟନଙ୍କ ବିଜେଡିରେ ଯୋଗଦାନ କାର୍ଯ୍ୟକ୍ରମରେ ମଧ୍ୟ ବିକ୍ରମଙ୍କ ଅନୁପସ୍ଥିତି ରାଜନୈତିକ ମହଳରେ ପ୍ରଶ୍ନ ସୃଷ୍ଟି କରିଥିଲା। ଏକଦା ନବୀନ ପଟ୍ଟନାୟକଙ୍କ ଅତ୍ୟନ୍ତ ବିଶ୍ୱସ୍ତ ଭାବେ ପରିଚିତ ବିକ୍ରମ ଦଳର ଗୁରୁତ୍ୱପୂର୍ଣ୍ଣ ଡାକରେ ମଧ୍ୟ ଉପସ୍ଥିତ ନ ରହିବାକୁ ନେଇ ବିଭିନ୍ନ କଳ୍ପନାଜଳ୍ପନା ଆରମ୍ଭ ହୋଇଛି।
ବିଜେପିର ସଙ୍କେତ
ଗଞ୍ଜାମରୁ ଆସୁଥିବା ମତ୍ସ୍ୟ ଓ ପ୍ରାଣୀ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି, ବିକ୍ରମ ଆରୁଖଙ୍କ ଭଳି ଜଣେ ଟାଣୁଆ ନେତା ବିଜେପିକୁ ଆସିଲେ ଦଳର ସଂଗଠନ ଆହୁରି ମଜବୁତ ହେବ।
ସେହିପରି ବିଜେପି ରାଜ୍ୟ ସଭାପତି ମନମୋହନ ସାମଲ ମଧ୍ୟ କହିଛନ୍ତି, “ଆମ ଦ୍ୱାର ସମସ୍ତଙ୍କ ପାଇଁ ଖୋଲା ଅଛି।” ଏହି ମନ୍ତବ୍ୟ ପରେ ବିକ୍ରମଙ୍କ ବିଜେପି ଯୋଗଦାନକୁ ନେଇ ଚର୍ଚ୍ଚା ଆହୁରି ଜୋର ଧରିଛି।
ଗଞ୍ଜାମରେ ବଦଳିଛି ରାଜନୈତିକ ସମୀକରଣ
ଏକଦା ବିଜେଡିର ଅଭେଦ୍ୟ ଗଡ଼ ଭାବେ ପରିଚିତ ଗଞ୍ଜାମରେ ୨୦୨୪ ନିର୍ବାଚନରେ ବଡ଼ ପରିବର୍ତ୍ତନ ଦେଖାଯାଇଥିଲା। ୧୩ଟି ବିଧାନସଭା ଆସନ ମଧ୍ୟରୁ କେବଳ ନବୀନ ପଟ୍ଟନାୟକଙ୍କ ହିଞ୍ଜିଳି ଆସନକୁ ଛାଡ଼ି ଅନ୍ୟ ସମସ୍ତ ଆସନରେ ବିଜେଡି ପରାଜିତ ହୋଇଥିଲା।
ଭଞ୍ଜନଗରରୁ ଲଗାତାର ୧୯୯୫ ମସିହାରୁ ଛଅ ଥର ବିଧାୟକ ଭାବେ ନିର୍ବାଚିତ ହୋଇଆସୁଥିବା ବିକ୍ରମ ଆରୁଖ ୨୦୨୪ ନିର୍ବାଚନରେ ବିଜେପି ପ୍ରାର୍ଥୀ ପ୍ରଦ୍ୟୁମ୍ନ ନାୟକଙ୍କଠାରୁ ପରାଜିତ ହୋଇଥିଲେ।
ନିର୍ବାଚନ ପ୍ରଚାର ସମୟରେ ବିକ୍ରମ ଆରୁଖ ଘୋଷଣା କରିଥିଲେ ଯେ, ଯଦି ସେ ନିର୍ବାଚନ ହାରିବେ, ତେବେ ସକ୍ରିୟ ରାଜନୀତିରୁ ଅବସର ନେବେ। ପରାଜୟ ପରଠାରୁ ସେ ସାର୍ବଜନୀନ ରାଜନୈତିକ କାର୍ଯ୍ୟକଳାପରେ ପ୍ରାୟ ଦେଖାଯାଉନାହାନ୍ତି।
ନବୀନଙ୍କ ପାଇଁ ବଡ଼ ଝଟକା ହେବ କି?
ରାଜନୈତିକ ମହଳରେ ଚର୍ଚ୍ଚା ହେଉଛି ଯେ, ବିକ୍ରମ ଆରୁଖ ପ୍ରକୃତରେ ବିଜେପିରେ ଯୋଗଦେଲେ ତାହା ବିଜେଡି, ବିଶେଷକରି ନବୀନ ପଟ୍ଟନାୟକଙ୍କ ପାଇଁ ନିଜ ଜିଲ୍ଲା ଗଞ୍ଜାମରେ ଏକ ବଡ଼ ରାଜନୈତିକ ଝଟକା ହୋଇପାରେ। ଏହା ପୂର୍ବରୁ ନବୀନଙ୍କ ଘନିଷ୍ଠ ସହଯୋଗୀ ଥିବା ପ୍ରଦୀପ ପାଣିଗ୍ରାହୀ ବିଜେଡିରୁ ବହିଷ୍କୃତ ହେବା ପରେ ବିଜେପିରେ ଯୋଗ ଦେଇ ବର୍ତ୍ତମାନ ସାଂସଦ ଅଛନ୍ତି।
ଅନ୍ୟପକ୍ଷରେ ବିଜେଡିର ବରିଷ୍ଠ ନେତା ରମେଶ ଚନ୍ଦ୍ର ଚ୍ୟାଉପଟ୍ଟନାୟକ କହିଛନ୍ତି, ବିକ୍ରମ ଆରୁଖ ଦଳ ଛାଡ଼ିଲେ ମଧ୍ୟ ବିଜେଡି ଉପରେ କୌଣସି ପ୍ରଭାବ ପଡ଼ିବ ନାହିଁ।
ରାଜନୈତିକ ସମୀକ୍ଷକଙ୍କ ମତ
ରାଜନୈତିକ ସମୀକ୍ଷକ ସନ୍ଦୀପ ମିଶ୍ରଙ୍କ ମତରେ, ବିଜେଡି ଯଦି ନିଜର ବରିଷ୍ଠ ଓ ପ୍ରଭାବଶାଳୀ ନେତାମାନଙ୍କୁ ଦଳରେ ଧରି ରଖିବାରେ ବିଫଳ ହୁଏ, ତେବେ ଆଗାମୀ ଦିନରେ ଦଳର ସ୍ଥିତି ଆହୁରି ଚ୍ୟାଲେଞ୍ଜିଂ ହୋଇପାରେ।
ଏପର୍ଯ୍ୟନ୍ତ ନୀରବ ବିକ୍ରମ
କଟକ ଓ ଭଦ୍ରକ ପରେ ଏବେ ବିଜେପିର ‘ମିଶନ ଗଞ୍ଜାମ’କୁ ନେଇ ଚର୍ଚ୍ଚା ଚାଲିଥିବାବେଳେ, ବିକ୍ରମ ଆରୁଖଙ୍କ ସମ୍ଭାବ୍ୟ ଦଳବଦଳକୁ ନେଇ ଅନେକ ଚର୍ଚ୍ଚା ହେଉଛି। ତେବେ ଏହି ସମସ୍ତ ଆଲୋଚନା ଓ ରାଜନୈତିକ ଚର୍ଚ୍ଚା ମଧ୍ୟରେ ବିକ୍ରମ ଆରୁଖ ଏପର୍ଯ୍ୟନ୍ତ କୌଣସି ସାର୍ବଜନୀନ ପ୍ରତିକ୍ରିୟା ଦେଇନାହାନ୍ତି। ତେଣୁ ତାଙ୍କ ଭବିଷ୍ୟତ ରାଜନୈତିକ ପଦକ୍ଷେପକୁ ନେଇ ସ୍ପଷ୍ଟ ଚିତ୍ର ଆସିବା ବାକି ରହିଛି।
